Skeda ta’ żmien u progress dwar l-euro diġitali

Il-fażi ta’ tħejjija tal-proġett bdiet f’Novembru 2023 u qed tistabbilixxi l-pedamenti għall-ħruġ potenzjali ta’ euro diġitali. Dan jinkludi l-finalizzazzjoni tal-ġabra ta’ regoli tal-iskema tal-euro diġitali u l-għażla ta’ fornituri li potenzjalment jistgħu jiżviluppaw pjattaforma u infrastruttura tal-euro diġitali. Il-fażi ta’ tħejjija tinvolvi ttestjar u esperimentazzjoni estensivi, kif ukoll skambji regolari mal-pubbliku u ma’ partijiet ikkonċernati oħrajn, sabiex jiġi żgurat li euro diġitali jissodisfa l-ħtiġijiet tal-utenti u r-rekwiżiti tal-Eurosistema.

Aħna niddokumentaw regolarment il-progress tal-proġett f’rapporti komprensivi.

F’Ottubru 2020, il-BĊE ppubblika rapport dwar l-euro diġitali li eżamina l-ħruġ potenzjali ta’ munita diġitali tal-bank ċentrali — l-euro diġitali — mill-Eurosistema.

Disa’ xhur wara, il-Kunsill Governattiv tal-BĊE ddeċieda li jniedi l-proġett tal-euro diġitali. Il-fażi ta’ investigazzjoni tal-proġett saret minn Ottubru 2021 sa Ottubru 2023 u involviet l-istudju ta’ għażliet ta’ disinn u mudelli ta’ distribuzzjoni f’kooperazzjoni mill-qrib mal-partijiet ikkonċernati bħal dawk li jfasslu l-politika tal-UE u l-parteċipanti fis-suq. Is-sejbiet iffurmaw il-bażi għad-deċiżjoni li titnieda l-fażi ta’ tħejjija, li bdiet f’Novembru 2023. Din il-fażi ta’ sentejn iffukat fuq l-iżvilupp ulterjuri tal-għażliet tad-disinn u r-rekwiżiti tekniċi għall-euro diġitali.

Ara u niżżel skeda ta’ żmien ta’ livell għoli għall-proġett

Il-Kunsill Governattiv tal-BĊE huwa mistenni jiddeċiedi dwar it-triq ’il quddiem għall-proġett tal-euro diġitali wara li l-fażi ta’ tħejjija attwali tintemm f’Ottubru 2025.

Id-deċiżjoni dwar jekk għandux jinħareġ l-euro diġitali se titqies biss fi stadju aktar tard ladarba jkun tlesta l-proċess leġiżlattiv tal-Unjoni Ewropea.